MARI E MARI,
KAS TUNJU PAR BETA DIMANA BAPA UCU DENG MAMA MARIA TINGGAL.
BARANG BETA PUNG WALANG, BETA MAU KASI PAR DONG TINGGAL.
WATE BISA BANTU? KA USI YANG MAU BANTU?
BIAR WER TARBAE
BIAR UJANG MALELE LAI
BETA MAU PIGI CARI DONG DUA ITU DOLO
TOKI MARI TOKI TOTOBUANG.
JANG TINGKAI, JANG BALAGU
BETA INI SU SIAP TANUAR SADIKI DI TAMPAYANG, PAR TETE MANIS PUNG HARI JADI
KAS TINGGAL BETA TABALERANG SAJA, MASI ADA BINTANG DI TIMUR PAR ATOR BETA PUNG STRAT.
BIAR KAKI TALANJANG
BIAR BETA BAJALANG PALEO
MAR TETAP BETA SAMPE DENG SALAMAT
JANG MUKA BANGKA, KALO BETA BISA SAMBUT TETE MANIS
DENG SUKACITA
BARANG BETA TABAOS, MAR ALE SENG MISTER ; BARU ALE SU TATIDOR SADAP DENG SOPI DI TAPALANG LAI
BETA MAU BILANG, JANG TALALO MANISO DENG HAL DUNIA. KARNA LASTE-LASTE NI, ORANG SU LABE SUKA LAIPOSE DENG PARAMPUANG MUDA, LA ABIS ITU RAMPAS ORANG PUNG TAMPA MAKANG. LASTE-LASTE NI ORANG LABE PASTIU PAR KASI RAPI KABONG, LA ABIS ITU CARITA ORANG PUNG TARBAE.
JUJARO DENG MONGARE,
BARENTI DARI SAGALA YANG TARBAE SUDAH. SOMBAYANG LA MINTA AMPONG.
SUPAYA KALO TETE MANIS DATANG LAI, KATONG SAMUA TARANGKA RAME-RAME KA ATAS...
IO LAI, SALAMAT KAJADIANG DENG KONCI TAONG...
AMATO...
